1	அன்றியும், அவர் அவர்களை நோக்கி: இங்கே நிற்கிறவர்களில் சிலர் தேவனுடைய ராஜ்யம் பலத்தோடே வருவதைக் காணுமுன், மரணத்தை ருசிபார்ப்பதில்லையென்று, மெய்யாகவே உங்களுக்குச் சொல்லுகிறேன் என்றார்.	மத் 16:28 லூக் 9:27
2	ஆறுநாளைக்குப்பின்பு, இயேசு பேதுருவையும், யாக்கோபையும், யோவானையும் அழைத்து, உயர்ந்த மலையின்மேல் அவர்களைத் தனியே கூட்டிக்கொண்டுபோய், அவர்களுக்கு முன்பாக மறுரூபமானார்.	மத் 17:11-13 லூக் 9:28-36
3	அவருடைய வஸ்திரம் உறைந்தமழையைப்போல் பூமியிலே எந்த வண்ணானும் வெளுக்கக்கூடாத வெண்மையாய்ப் பிரகாசித்தது.	சங் 104:1 சங் 104:2 தானி 7:9 மத் 28:3 அப் 10:30
4	அப்பொழுது மோசேயும் எலியாவும் இயேசுவுடனே பேசுகிறவர்களாக அவர்களுக்குக் காணப்பட்டார்கள்.	மத் 11:13 மத் 17:3 மத் 17:4 லூக் 9:19 லூக் 9:30 லூக் 9:31 லூக் 24:27 லூக் 24:44 யோவா 5:39 யோவா 5:45-47 அப் 3:21-24 1பேது 1:10-12 வெளிப் 19:10
5	அப்பொழுது பேதுரு இயேசுவை நோக்கி: ரபீ, நாம் இங்கே இருக்கிறது நல்லது; உமக்கு ஒரு கூடாரமும், மோசேக்கு ஒரு கூடாரமும், எலியாவுக்கு ஒரு கூடாரமுமாக, மூன்று கூடாரங்களைப் போடுவோம் என்றான்.	யாத் 33:17-23 சங் 62:2 சங் 62:3 சங் 84:10 யோவா 14:8 யோவா 14:9 யோவா 14:21-23 பிலிப் 1:23 1யோவா 3:2 வெளிப் 22:3 வெளிப் 22:4
6	அவர்கள் மிகவும் பயந்திருந்தபடியால், தான் பேசுகிறது இன்னதென்று அறியாமல் இப்படிச் சொன்னான்.	மாற் 16:5-8 தானி 10:15-19 வெளிப் 1:17
7	அப்பொழுது, ஒரு மேகம் அவர்கள்மேல் நிழலிட்டது: இவர் என்னுடைய நேசகுமாரன், இவருக்குச் செவிகொடுங்கள் என்று அந்த மேகத்திலிருந்து ஒரு சத்தம் உண்டாயிற்று.	யாத் 40:34 1இரா 8:10-12 சங் 97:2 தானி 7:13 மத் 17:5-7 மத் 26:64 லூக் 9:34-36 அப் 1:9 வெளிப் 1:7
8	உடனே அவர்கள் சுற்றிலும் பார்த்தபோது, இயேசு ஒருவரைத்தவிர வேறொருவரையும் காணவில்லை.	லூக் 9:36 லூக் 24:31 அப் 8:39 அப் 8:40 அப் 10:16
9	அவர்கள் மலையிலிருந்து இறங்குகிறபோது, அவர் அவர்களை நோக்கி: மனுஷகுமாரன் மரித்தோரிலிருந்து எழுந்திருக்கும்வரைக்கும், நீங்கள் கண்டவைகளை ஒருவருக்கும் சொல்லவேண்டாம் என்று கட்டளையிட்டார்.	மாற் 5:43 மாற் 8:29 மாற் 8:30 மத் 12:19 மத் 17:9
10	மரித்தோரிலிருந்து எழுந்திருப்பது என்னவென்று அவர்கள் ஒருவரிடத்தில் ஒருவர் விசாரித்து, அந்த வார்த்தையைத் தங்களுக்குள்ளே அடக்கிக்கொண்டு:	ஆதி 37:11 லூக் 2:50 லூக் 2:51 லூக் 24:7 லூக் 24:8 யோவா 16:17-19
11	எலியா முந்தி வரவேண்டுமென்று வேதபாரகர் சொல்லுகிறார்களே, அதெப்படியென்று அவரிடத்தில் கேட்டார்கள்.	மாற் 9:4 மல்கி 3:1 மல்கி 4:5 மத் 11:14 மத் 17:10 மத் 17:11
12	அவர் பிரதியுத்தரமாக: எலியாமுந்திவந்து எல்லாவற்றையும் சீர்ப்படுத்துவது மெய்தான்; அல்லாமலும், மனுஷகுமாரன் பல பாடுகள்பட்டு, அவமதிக்கப்படுவாரென்று, அவரைக்குறித்து எழுதியிருக்கிறதே அது எப்படி என்றார்.	மாற் 1:2-8 ஏசா 40:3-5 மல்கி 4:6 மத் 3:1-12 மத் 11:2-18 லூக் 1:16 லூக் 1:17 லூக் 1:76 லூக் 3:2-6 யோவா 1:6-36 யோவா 3:27-30
13	ஆனாலும் எலியா வந்தாயிற்று, அவனைக்குறித்து எழுதியிருக்கிற பிரகாரம் தங்களுக்கு இஷ்டமானபடி அவனுக்குச் செய்தார்களென்று, உங்களுக்குச் சொல்லுகிறேன் என்றார்.	மத் 11:14 மத் 17:12 மத் 17:13 லூக் 1:17
14	பின்பு அவர் சீஷரிடத்தில் வந்தபோது, அவர்களைச் சுற்றித் திரளான ஜனங்கள் நிற்கிறதையும், அவர்களோடே வேதபாரகர் தர்க்கிக்கிறதையும் கண்டார்.	மத் 17:14-21 லூக் 9:37
15	ஜனங்களெல்லாரும் அவரைக் கண்டவுடனே மிகவும் ஆச்சரியப்பட்டு, ஓடிவந்து, அவருக்கு வந்தனஞ்செய்தார்கள்.	மாற் 9:2 மாற் 9:3 யாத் 34:30
16	அவர் வேதபாரகரை நோக்கி: நீங்கள் இவர்களோடே என்னத்தைக் குறித்துத் தர்க்கம்பண்ணுகிறீர்கள் என்று கேட்டார்.	மாற் 8:11 லூக் 5:30-32
17	அப்பொழுது ஜனக்கூட்டத்தில் ஒருவன் அவரை நோக்கி: போதகரே, ஊமையான ஒரு ஆவி பிடித்த என் மகனை உம்மிடத்தில் கொண்டுவந்தேன்.	மாற் 5:23 மாற் 7:26 மாற் 10:13 மத் 17:15 லூக் 9:38 யோவா 4:47
18	அது அவனை எங்கே பிடித்தாலும் அங்கே அவனை அலைக்கழிக்கிறது; அப்பொழுது அவன் நுரைதள்ளி, பல்லைக்கடித்து, சோர்ந்துபோகிறான். அதைத் துரத்திவிடும்படி உம்முடைய சீஷரிடத்தில் கேட்டேன்; அவர்களால் கூடாமற்போயிற்று என்றான்.	மாற் 9:26 மத் 15:22 லூக் 9:39
19	அவர் பிரதியுத்தரமாக: விசுவாசமில்லாத சந்ததியே, எதுவரைக்கும் நான் உங்களோடு இருப்பேன்? எதுவரைக்கும் உங்களிடத்தில் பொறுமையாய் இருப்பேன்? அவனை என்னிடத்தில் கொண்டுவாருங்கள் என்றார்.	மாற் 16:14 எண் 14:11 எண் 14:22 எண் 14:27 எண் 32:13 எண் 32:14 உபா 32:20 சங் 78:6-8 சங் 78:22-8 சங் 106:21-25 மத் 17:17 லூக் 9:41 லூக் 24:25 யோவா 12:27 யோவா 20:27 எபிரெ 3:10-12
20	அவனை அவரிடத்தில் கொண்டுவந்தார்கள். அவரைக் கண்டவுடனே, அந்த ஆவி அவனை அலைக்கழித்தது; அவன் தரையிலே விழுந்து, நுரைதள்ளிப் புரண்டான்.	மாற் 9:18 மாற் 9:26 மாற் 1:26 மாற் 5:3-5 யோபு 1:10-12 யோபு 2:6-8 லூக் 4:35 லூக் 8:29 லூக் 9:42 யோவா 8:44 1பேது 5:8
21	அவர் அவனுடைய தகப்பனை நோக்கி: இது இவனுக்கு உண்டாகி எவ்வளவு காலமாயிற்று என்று கேட்டார். அதற்கு அவன்: சிறுவயது முதற்கொண்டே உண்டாயிருக்கிறது;	மாற் 5:25 யோபு 5:7 யோபு 14:1 சங் 51:5 லூக் 8:43 லூக் 13:16 யோவா 5:5 யோவா 5:6 யோவா 9:1 யோவா 9:20 யோவா 9:21 அப் 3:2 அப் 4:22 அப் 9:33 அப் 14:8
22	இவனைக் கொல்லும்படிக்கு அது அநேகந்தரம் தீயிலும் தண்ணீரிலும் தள்ளிற்று. நீர் ஏதாகிலும் செய்யக்கூடுமானால், எங்கள்மேல் மனதிரங்கி, எங்களுக்கு உதவிசெய்யவேண்டும் என்றான்.	மாற் 1:40-42 மத் 8:2 மத் 8:8 மத் 8:9 மத் 9:28 மத் 14:31
23	இயேசு அவனை நோக்கி: நீ விசுவாசிக்கக்கூடுமானால் ஆகும், விசுவாசிக்கிறவனுக்கு எல்லாம் கூடும் என்றார்.	மாற் 11:23 2நாளா 20:20 மத் 17:20 மத் 21:21 மத் 21:22 லூக் 17:6 யோவா 4:48-50 யோவா 11:40 அப் 14:9 எபிரெ 11:6
24	உடனே பிள்ளையின் தகப்பன்: விசுவாசிக்கிறேன் ஆண்டவரே, என் அவிசுவாசம் நீங்கும்படி உதவிசெய்யும் என்று கண்ணீரோடே சத்தமிட்டுச் சொன்னான்.	2சாமு 16:12 2இரா 20:5 சங் 39:12 சங் 126:5 எரே 14:17 லூக் 7:38 லூக் 7:44 அப் 10:19 அப் 10:31 2கொரி 2:4 2தீமோ 1:4 எபிரெ 5:7 எபிரெ 12:17
25	அப்பொழுது ஜனங்கள் கூட்டமாய் ஓடிவருகிறதை இயேசு கண்டு, அந்த அசுத்த ஆவியை நோக்கி: ஊமையும் செவிடுமான ஆவியே, இவனை விட்டுப் புறப்பட்டுப்போ, இனி இவனுக்குள் போகாதே என்று நான் உனக்குக் கட்டளையிடுகிறேன் என்று அதை அதட்டினார்.	மாற் 1:25-27 மாற் 5:7 மாற் 5:8 சகரி 3:2 மத் 17:18 லூக் 4:35 லூக் 4:41 லூக் 9:42 யூதா 1:9
26	அப்பொழுது அது சத்தமிட்டு, அவனை மிகவும் அலைக்கழித்துப் புறப்பட்டுப்போயிற்று. அவன் செத்துப்போனான் என்று அநேகர் சொல்லத்தக்கதாகச் செத்தவன்போல் கிடந்தான்.	மாற் 9:18 மாற் 9:20 மாற் 1:26 யாத் 5:23 வெளிப் 12:12
27	இயேசு அவன் கையைப்பிடித்து, அவனைத் தூக்கினார்; உடனே அவன் எழுந்திருந்தான்.	மாற் 1:31 மாற் 1:41 மாற் 5:41 மாற் 8:23 ஏசா 41:13 அப் 3:7 அப் 9:41
28	வீட்டில் அவர் பிரவேசித்தபொழுது, அவருடைய சீஷர்கள்: அதைத் துரத்திவிட எங்களால் ஏன் கூடாமற்போயிற்று என்று அவரிடத்தில் தனித்துக் கேட்டார்கள்.	மாற் 4:10 மாற் 4:34 மத் 13:10 மத் 13:36 மத் 15:15
29	அதற்கு அவர்: இவ்வகைப் பிசாசு ஜெபத்தினாலும் உபவாசத்தினாலுமேயன்றி மற்றெவ்விதத்தினாலும் புறப்பட்டுப்போகாது என்றார்.	மத் 12:45 லூக் 11:26
30	பின்பு அவ்விடம் விட்டுப் புறப்பட்டு, கலிலேயாவைக் கடந்துபோனார்கள்; அதை ஒருவரும் அறியாதிருக்கவேண்டுமென்று விரும்பினார்.	மத் 27:22 மத் 27:23
31	ஏனெனில் மனுஷகுமாரன் மனுஷர் கைகளில் ஒப்புக்கொடுக்கப்படுவார் என்றும், அவர்கள் அவரைக் கொன்றுபோடுவார்கள் என்றும்; கொல்லப்பட்டு, மூன்றாம் நாளிலே உயிர்த்தெழுந்திருப்பார் என்றும் அவர் தம்முடைய சீஷர்களுக்குப் போதகம்பண்ணிச் சொல்லியிருந்தார்.	மாற் 9:12 மாற் 8:31 மத் 16:21 மத் 20:18 மத் 20:19 மத் 20:28 மத் 21:38 மத் 21:39 மத் 26:2 லூக் 9:44 லூக் 18:31-33 லூக் 24:26 லூக் 24:44-46 யோவா 2:19 யோவா 3:14 யோவா 10:18 அப் 2:23 அப் 2:24 அப் 4:27 அப் 4:28 2தீமோ 2:12
32	அவர்களோ அந்த வார்த்தையை அறிந்துகொள்ளவில்லை, அதைக்குறித்து அவரிடத்தில் கேட்கவும் பயந்தார்கள்.	மாற் 9:10 லூக் 2:50 லூக் 9:45 லூக் 18:34 லூக் 24:45
33	அவர் கப்பர்நகூமுக்கு வந்து, வீட்டிலே இருக்கும்போது, அவர்களை நோக்கி: நீங்கள் வழியிலே எதைக்குறித்து உங்களுக்குள்ளே தர்க்கம்பண்ணினீர்கள் என்று கேட்டார்.	மத் 17:24
34	அதற்கு அவர்கள் பேசாமல் இருந்தார்கள்; ஏனெனில் அவர்கள் தங்களுக்குள்ளே எவன் பெரியவன் என்று வழியில் தர்க்கம்பண்ணினார்கள்.	மத் 18:1-5 மத் 20:21-24 லூக் 9:46-48 லூக் 22:24-30 ரோம 12:10 பிலிப் 2:3-7 1பேது 5:3 3யோவா 1:9
35	அப்பொழுது அவர் உட்கார்ந்து, பன்னிருவரையும் அழைத்து: எவனாகிலும் முதல்வனாயிருக்க விரும்பினால் அவன் எல்லாருக்கும் கடையானவனும், எல்லாருக்கும் ஊழியக்காரனுமாயிருக்கக்கடவன் என்று சொல்லி;	மாற் 10:42-45 நீதி 13:10 எரே 45:5 மத் 20:25-28 லூக் 14:10 லூக் 14:11 லூக் 18:14 யாக் 4:6
36	ஒரு சிறுபிள்ளையை எடுத்து, அதை அவர்கள் நடுவிலே நிறுத்தி, அதை அணைத்துக்கொண்டு:	மாற் 10:16 மத் 18:2 மத் 19:14 மத் 19:15
37	இப்படிப்பட்ட சிறு பிள்ளைகளில் ஒன்றை என் நாமத்தினாலே ஏற்றுக்கொள்ளுகிறவன் என்னை ஏற்றுக்கொள்ளுகிறான்; என்னை ஏற்றுக்கொள்ளுகிறவன் என்னை அல்ல, என்னை அனுப்பினவரை ஏற்றுக்கொள்ளுகிறான் என்றார்.	மத் 10:40-42 மத் 18:3-5 மத் 18:10-5 மத் 25:40 லூக் 9:48
38	அப்பொழுது யோவான் அவரை நோக்கி: போதகரே, நம்மைப் பின்பற்றாதவன் ஒருவன் உமது நாமத்தினாலே பிசாசுகளைத் துரத்துகிறதைக் கண்டோம்; அவன் நம்மைப் பின்பற்றாதவனானதால், அவனைத் தடுத்தோம் என்றான்.	எண் 11:26-29 லூக் 9:49 லூக் 9:50 லூக் 11:19
39	அதற்கு இயேசு: அவனைத் தடுக்கவேண்டாம்; என் நாமத்தினாலே அற்புதஞ்செய்கிறவன் எளிதாய் என்னைக்குறித்துத் தீங்கு சொல்லமாட்டான்.	மாற் 10:13 மாற் 10:14 மத் 13:28 மத் 13:29 பிலிப் 1:18
40	நமக்கு விரோதமாயிராதவன் நமது பட்சத்திலிருக்கிறான்.	மத் 12:30 லூக் 11:23
41	நீங்கள் கிறிஸ்துவினுடையவர்களாயிருக்கிறபடியினாலே, என் நாமத்தினிமித்தம் உங்களுக்கு ஒரு கலசம் தண்ணீர்க் குடிக்கக் கொடுக்கிறவன் தன் பலனை அடையாமற்போவதில்லை என்று மெய்யாகவே உங்களுக்குச் சொல்லுகிறேன்.	மத் 10:42 மத் 25:40
42	என்னிடத்தில் விசுவாசமாயிருக்கிற இந்தச் சிறியரில் ஒருவனுக்கு இடறல் உண்டாக்குகிறவன் எவனோ, அவனுடைய கழுத்தில் ஏந்திரக்கல்லைக் கட்டி, சமுத்திரத்தில் அவனைத் தள்ளிப்போடுகிறது அவனுக்கு நலமாயிருக்கும்.	மத் 18:6 மத் 18:10 லூக் 17:1 லூக் 17:2 ரோம 14:13 ரோம 15:21 ரோம 16:17 1கொரி 8:10-13 1கொரி 10:32 1கொரி 10:33 2கொரி 6:3 பிலிப் 1:10 1தீமோ 5:14 2பேது 2:2
43	உன் கை உனக்கு இடறல் உண்டாக்கினால், அதைத் தறித்துப்போடு; நீ இரண்டு கையுடையவனாய் அவியாத அக்கினியுள்ள நரகத்திலே போவதைப்பார்க்கிலும், ஊனனாய் ஜீவனுக்குள் பிரவேசிப்பது உனக்கு நலமாயிருக்கும்.	உபா 13:6-8 மத் 5:29 மத் 5:30 மத் 18:8 மத் 18:9 ரோம 8:13 1கொரி 9:27 கலா 5:24 கொலோ 3:5 தீத் 2:12 எபிரெ 12:1 1பேது 2:1
44	அங்கே அவர்கள் புழு சாவாமலும் அக்கினி அவியாமலுமிருக்கும்.	மாற் 9:46 மாற் 9:48 ஏசா 66:24
45	உன் கால் உனக்கு இடறல் உண்டாக்கினால் அதைத் தறித்துப்போடு; நீ இரண்டு காலுடையவனாய் அவியாத அக்கினியுள்ள நரகத்திலே தள்ளப்படுவதைப்பார்க்கிலும், சப்பாணியாய் ஜீவனுக்குள் பிரவேசிப்பது உனக்கு நலமாயிருக்கும்.	மாற் 9:43 மாற் 9:44
46	அங்கே அவர்கள் புழு சாவாமலும் அக்கினி அவியாமலுமிருக்கும்.	லூக் 16:24-26
47	உன் கண் உனக்கு இடறல் உண்டாக்கினால், அதைப் பிடுங்கிப்போடு; நீ இரண்டு கண்ணுடையவனாய் நரக அக்கினியிலே தள்ளப்படுவதைப்பார்க்கிலும், ஒற்றைக் கண்ணனாய் தேவனுடைய ராஜ்யத்தில் பிரவேசிப்பது உனக்கு நலமாயிருக்கும்.	ஆதி 3:6 யோபு 31:1 சங் 119:37 மத் 5:28 மத் 5:29 மத் 10:37-39 லூக் 14:26 கலா 4:15 பிலிப் 3:7 பிலிப் 3:8
48	அங்கே அவர்கள் புழு சாவாமலும் அக்கினி அவியாமலுமிருக்கும்.	மாற் 9:44 மாற் 9:46
49	எந்தப் பலியும் உப்பினால் உப்பிடப்படுவதுபோல, எந்த மனுஷனும் அக்கினியினால் உப்பிடப்படுவான்.	லேவி 2:13 எசே 43:24
50	உப்பு நல்லதுதான், உப்பு சாரமற்றுப்போனால், அதற்கு எதினாலே சாரமுண்டாக்குவீர்கள்? உங்களுக்குள்ளே உப்புடையவர்களாயிருங்கள், ஒருவரோடொருவர் சமாதானமுள்ளவர்களாயும் இருங்கள் என்றார்.	யோபு 6:6 மத் 5:13 லூக் 14:34 லூக் 14:35