நான் எதிலிருந்து இரட்சிக்கப்பட வேண்டும்? நீங்கள் எதிலிருந்து இரட்சிக்கப்பட விரும்புகிறீர்கள்? நரகத்திலிருந்தா? நரகம் என்ற ஒன்று இல்லையென்று நினைக்கிறீர்களா? ஏனெனில், அங்கு செல்ல யாரும் விரும்புவதில்லை. பரிசுத்த தேவனுக்கும் மனிதனுக்கும் இடையிலான தலையாய பிரச்சினை 'பாவம்'. நீங்கள் அந்தப் பாவத்திலிருந்து இரட்சிக்கப்பட விரும்புகிறீர்களா?

பாவம் என்றால் என்ன?

பாவம் என்பது தேவனுக்கு எதிராகக் கலகம் செய்வதாகும். மனிதன் தன் சுய இச்சைகளைத் திருப்திப்படுத்துவதும், தேவனுடைய கட்டளைகளை முற்றிலும் தவிர்ப்பதும் பாவம். "என்னுடைய நடத்தை தேவனை மகிழ்விக்கிறதா அல்லது காயப்படுத்துகிறதா?" என்பதைக்குறித்து எந்தவித அக்கறையும் இல்லாமல் அலட்சியமாக இருப்பதும் பாவமே. தேவனுடைய சித்தத்திற்கு விரோதமான நம்முடைய ஒவ்வொரு செயல்பாடும் பாவம்; தேவனுக்கு விரோதமான நம் சிந்தனையும் பாவமே.

தேவன் ஒருவனை இரட்சிப்பதற்கு முன்பு, முதலில் அவனைப் பாவத்தினால் உண்டாகும் குற்ற உணர்ச்சிக்கு உட்படுத்தி, தான் ஒரு பாவி என்பதை உணரவைக்கிறார். இதன் அர்த்தம், "ஆம், நாம் அனைவரும் பாவிகள், அது எனக்குத் தெரியும்" என்று மற்றவர்களுடன் சேர்ந்து மேலோட்டமாகச் சொல்வதல்ல. மாறாக, பரிசுத்த ஆவியானவர் மனிதனின் இருதயத்தில் ஆழமான குற்ற உணர்ச்சியை உண்டாக்குகிறார். "நான் வாழ்நாள் முழுவதும் தேவனுக்கு எதிராகக் கலகம் செய்துவிட்டேன்; என் பாவங்கள் ஏராளமாகவும், மிகப்பெரிதாகவும், மிகவும் கடுமையாகவும் இருக்கின்றன; தேவனின் கிருபையை எட்டாத அளவுக்கு நான் வெகுதூரம் சென்றுவிட்டேன்" என்று பயந்து நடுங்க வைப்பதே அந்த உணர்வாகும்.

இந்த அனுபவம் உங்களுக்கு ஏற்பட்டிருக்கிறதா? நீங்கள் உங்களைப் பரலோகத்திற்கு முற்றிலும் தகுதியற்றவராக நினைக்கிறீர்களா? பரிசுத்த தேவனின் முன்னிலையில் நிற்பதற்கு அஞ்சுகிறீர்களா? உங்களில் எந்த நன்மையும் இல்லை என்றும், உங்கள் கணக்கில் எந்தப் புண்ணியமும் இல்லை என்றும் இப்போது உங்களுக்குத் தெரிகிறதா? தேவன் வெறுக்கும் காரியங்களை நீங்கள் நேசித்தீர்கள் என்றும், அவர் நேசிக்கும் காரியங்களை நீங்கள் வெறுத்தீர்கள் என்றும் உங்களுக்குப் புரிகிறதா?

இதை உணர்ந்து, தேவனுக்கு முன்பாக உங்கள் இருதயம் உடைந்திருக்கிறதா? கர்த்தருடைய ஓய்வுநாளை நீங்கள் அவமதித்ததற்காகவும், அவருடைய வார்த்தையைப் புறக்கணித்ததற்காகவும், உங்கள் எண்ணங்கள், ஆசைகள் மற்றும் உங்கள் வாழ்க்கையில் அவருக்கு உண்மையான இடத்தைக் கொடுக்காததற்காகவும் நீங்கள் துக்கப்படுகிறீர்களா? இதை நீங்கள் இன்னும் தனிப்பட்ட முறையில் உணரவில்லையென்றால், இப்போதைக்கு உங்களுக்கு எந்த நம்பிக்கையும் இல்லை. ஏனென்றால் தேவன் சொல்லுகிறார்:

"நீங்கள் மனந்திரும்பாமற்போனால் எல்லாரும் அப்படியே கெட்டுப்போவீர்கள்" (லூக்கா 13:3).

நீங்கள் இந்த நிலையிலேயே மரித்தால், எப்போதும் நரகத்திலே அழிந்துபோவீர்கள்.

ஆனால், இப்போது பாவம் உங்களுக்கு மிகப்பெரிய பிரச்சனையாகவும், தேவனைத் துக்கப்படுத்துவது உங்களுக்கு மிகப்பெரிய வேதனையாகவும் இருந்தால், கர்த்தரை மகிழ்விக்கவும் மகிமைப்படுத்தவும் உங்கள் மனம் விரும்பினால், நிச்சயமாக உங்களுக்கு நம்பிக்கை உண்டு.

"இழந்துபோனதைத் தேடவும் இரட்சிக்கவுமே மனுஷகுமாரன் (இயேசு கிறிஸ்து) வந்திருக்கிறார்" (லூக்கா 19:10).

நீங்கள் அவருக்கு எதிரான உங்கள் ஆயுதங்களைக் கீழே போடத் தயாராக இருந்து, அவருடைய ஆளுகையைப் பணிந்து ஏற்றுக்கொண்டு, உங்களை அவருடைய கட்டுப்பாட்டில் ஒப்புக்கொடுத்தால், அவர் உங்களை இரட்சிப்பார்.

அவருடைய இரத்தம் மிகவும் கறைபடிந்தவரையும் சுத்தமாக்கும். அவருடைய கிருபை பலவீனமானவரையும் தாங்கி உதவும். அவருடைய பெலன் சோதனையிலிருந்து நம்மை விடுவிக்கும்.

"இதோ, இப்பொழுதே அநுக்கிரககாலம், இப்பொழுதே இரட்சணிய நாள்" (2 கொரிந்தியர் 6:2).

கிறிஸ்துவுக்கு உங்களை அடிமைகளாக ஒப்புக்கொடுங்கள். உங்கள் இருதயத்தின் சிங்காசனத்தை அவரிடம் கொடுங்கள். உங்கள் வாழ்க்கையின் ஒழுங்குமுறையை அவரிடம் ஒப்படையுங்கள். அவருடைய பரிகார பலியின்மேல் நம்பிக்கை வையுங்கள். முழு ஆத்துமாவோடும் அவரை நேசியுங்கள்; முழு வல்லமையோடும் அவருக்குக் கீழ்ப்படியுங்கள். அவர் உங்களைப் பரலோகத்திற்கு அழைத்துச் செல்வார்.

"அவருடைய நாமத்தின்மேல் விசுவாசமுள்ளவர்களாய் அவரை ஏற்றுக்கொண்டவர்கள் எத்தனைபேர்களோ, அத்தனை பேர்களும் தேவனுடைய பிள்ளைகளாகும்படி, அவர்களுக்கு அதிகாரங்கொடுத்தார்." (யோவான் 1:12)

"பூமியின் எல்லையெங்குமுள்ளவர்களே, என்னை நோக்கிப்பாருங்கள்; அப்பொழுது இரட்சிக்கப்படுவீர்கள்; நானே தேவன், வேறொருவரும் இல்லை." (ஏசாயா 45:22)