திருமணம் ஏன் கனமானது என்பதை விளக்குவதற்கு பத்து காரணத்தை வேதத்திலிருந்து மிகவும் சுருக்கமாக பார்ப்போம். தொடர்ந்து வாசிக்க...

இக்கட்டுரை புதிதாகத் திருமணம் செய்துகொள்கிறவர்களுக்கு மட்டுமல்ல, ஏற்கனவே திருமணமானவர்களுக்கும், இனி வருங்காலங்களில் திருமணம் செய்துகொள்ளக் காத்திருப்பவர்களுக்கும் மிகவும் அவசியமானது. திருமணம் ஏன் கனமானது என்பதை விளக்கும் பத்து காரணங்களை வேதத்தின் அடிப்படையில் சுருக்கமாகப் பார்ப்போம்.

முதலாவது காரணம்: தேவனே திருமணத்தை ஏற்படுத்தினார் திருமண பந்தத்தை அல்லது திருமண அமைப்பை ஏற்படுத்தியது தேவன் என்பதை நாம் வேதத்தில் பார்க்கிறோம். மனிதர்களாகிய நாம் அறிந்துகொள்ள வேண்டிய முக்கியமான விஷயம் என்னவென்றால், திருமணம் என்பது மனித சிந்தனையிலோ அல்லது யோசனையிலோ தோன்றியது அல்ல. "நான் திருமணம் செய்து கொண்டால் நன்றாக இருக்கும்" என்றோ, "என்னுடைய நலன்களைக் குறித்து யோசிக்க யாராவது இருந்தால் நல்லது" என்றோ ஆதாம் தேவனிடம் கேட்டதாக நாம் வேதத்தில் பார்க்கிறோமா? இல்லை. மாறாக, தேவனே ஆதாமைப் பார்த்து, "மனுஷன் தனிமையாயிருப்பது நல்லதல்ல, ஏற்ற துணையை அவனுக்கு உண்டாக்குவேன்" (ஆதியாகமம் 2:18) என்றார். இந்த வார்த்தையின் மூலம், மனிதனின் நன்மைக்காக தேவனின் மனதிலிருந்து உருவானதே திருமண அமைப்பு என்பதை நாம் புரிந்துகொள்ள முடிகிறது. ஆதியாகமம் முதல் அதிகாரத்தில் தேவன் படைத்த அனைத்தையும் "நல்லது" என்று சொன்னதைப் போல, திருமணமும் அவரால் ஏற்படுத்தப்பட்டதால் அது நல்லது; அது மனிதனின் நன்மைக்காகவே உள்ளது. ஆகவே, தேவன் ஏற்படுத்தியதாலேயே திருமணம் கனமானது.

இரண்டாவது காரணம்: இணைப்பவர் தேவனே ஒவ்வொரு திருமணத்திலும் இருவரையும் இணைப்பது தேவனே. ஒரு சந்தர்ப்பத்தில் பரிசேயர்கள் இயேசு கிறிஸ்துவிடம் வந்து, "தள்ளுதற்சீட்டை எழுதிக்கொடுத்து, அவளைத் தள்ளிவிடலாமென்று மோசே உத்தரவு கொடுத்திருக்கிறாரே" (மாற்கு 10:4,5) என்று கேட்டார்கள். அதற்கு இயேசு, "ஆகையால், தேவன் இணைத்ததை மனுஷன் பிரிக்காதிருக்கக்கடவன்" (மாற்கு 10:9) என்று பதிலளித்தார். இந்த வசனத்தின்படி, இணைப்பவர் யார்? மனிதன் அல்ல, தேவனே ஒவ்வொரு திருமணத்தையும் ஏற்படுத்துகிறார். திருமணம் எந்த முறையில் அல்லது எந்த இடத்தில் நடந்தாலும் சரி, அங்கு திருமணம் என்று ஒன்று நடைபெற்றால், அந்தத் தம்பதிகளை இணைத்தவர் தேவன் என்பதை நாம் புரிந்துகொள்ள வேண்டும். தேவன் இணைத்ததை மனிதன் பிரிக்கக்கூடாது என்பதாலேயே திருமணம் கனமானது.

மூன்றாவது காரணம்: தேவனே சாட்சி "கர்த்தர் உனக்கும் உன் இளவயதின் மனைவிக்கும் சாட்சியாயிருக்கிறார்" (மல்கியா 2:14). ஒரு திருமணம் நடக்கும்போது அதற்கு யார் சாட்சி என்று இந்த வசனம் சொல்லுகிறது? அரசாங்கமோ, திருச்சபையோ அல்லது மனிதர்களோ முதன்மையான சாட்சிகள் அல்ல; தேவனே சாட்சியாயிருக்கிறார். பதிவுத் திருமணத்திற்காக அரசாங்கத்திற்கு கையெழுத்து தேவைப்படலாம். ஆனால், தம்பதிகள் தேவனுடைய முன்னிலையில் ஒருவருக்கொருவர் உறுதியளிக்கையில், அந்தத் திருமணத்திற்கு தேவனே சாட்சியாக இருக்கிறார். தேவன் எதற்குச் சாட்சியாக இருக்கிறாரோ, அதை நாம் கனமானதாகவும் உயர்ந்ததாகவும் எண்ண வேண்டும். இதை உணராதவன் தேவனுடைய நாமத்தை வீணிலே வழங்குகிறவனாகவும், தேவனின் பார்வையில் குற்றவாளியாகவும் இருப்பான்.

நான்காவது காரணம்: பெற்றோரைக் காட்டிலும் உயர்ந்த பந்தம் மனித உறவுகள் அனைத்தையும் விட திருமணத்தையே தேவன் மிக உயர்ந்ததாக வைத்துள்ளார். "இதினிமித்தம் புருஷன் தன் தகப்பனையும் தன் தாயையும் விட்டு, தன் மனைவியோடே இசைந்திருப்பான்; அவர்கள் ஒரே மாம்சமாயிருப்பார்கள்" (ஆதியாகமம் 2:24). தாய், தகப்பன் உறவைக் காட்டிலும் உயர்ந்ததாக தேவன் திருமணத்தைப் பார்க்கிறார். நம்முடைய கலாச்சார சூழலில், பெண்கள் மட்டுமே திருமணத்திற்குப் பிறகு தாய் வீட்டை விட்டு வரவேண்டும் என்ற முறை உள்ளது. ஆனால் வேதம் ஆணையும் பார்த்து, "உன் ஜனத்தையும் உன் தகப்பன் வீட்டையும் மறந்துவிடு" (சங்கீதம் 45:10) என்று பொதுவான நியதியை உணர்த்துகிறது. தேவன் ஏற்படுத்திய திருமண பந்தத்தில் கணவன், மனைவி இருவரும் மட்டுமே இணைந்து இருக்க வேண்டும்; அங்கு மூன்றாவது நபருக்கு இடமில்லை.

ஐந்தாவது காரணம்: கிறிஸ்து மற்றும் சபையின் உறவுக்கு அடையாளம் தேவன் தனக்கும் தம்முடைய மக்களுக்கும் உள்ள உறவை அடையாளப்படுத்துவதற்கு திருமண பந்தத்தையே ஒப்பிடுகிறார். தேவன் தம் மக்கள் மீது வைத்திருக்கும் அன்பையும் அக்கறையையும் விளக்குவதற்குத் திருமணத்தையே உதாரணமாகப் பயன்படுத்தினார். பழைய ஏற்பாட்டிலே தேவன் இஸ்ரவேல் மக்களோடு கொண்ட உறவும், புதிய ஏற்பாட்டிலே கிறிஸ்து திருச்சபையோடு கொண்ட உறவும் மணவாளன்-மணவாட்டி உறவாகச் சித்தரிக்கப்படுகிறது. தேவனே தம்முடைய உறவை விளக்க திருமணத்தை உதாரணமாகக் கொள்வதிலிருந்து, அவருடைய பார்வையில் அது எவ்வளவு கனமானது என்பதை நாம் அறிந்துகொள்ளலாம்.

ஆறாவது காரணம்: அன்பு மற்றும் கீழ்ப்படிதலின் மாதிரி கணவன் மனைவிக்கிடையிலான ஐக்கியம் எப்படி இருக்க வேண்டும் என்பதற்கு, கிறிஸ்துவும் திருச்சபையும் முன்னிறுத்தப்பட்டுள்ளனர். எபேசியர் 5:21-29 பகுதிகளில் இது தெளிவாகக் கூறப்பட்டுள்ளது: "மனைவிகளே, கர்த்தருக்குக் கீழ்ப்படிகிறதுபோல, உங்கள் சொந்தப் புருஷருக்குங் கீழ்ப்படியுங்கள்... புருஷர்களே, உங்கள் மனைவிகளில் அன்புகூருங்கள்; அப்படியே கிறிஸ்துவும் சபையில் அன்புகூர்ந்து... தம்மைத்தாமே அதற்காக ஒப்புக்கொடுத்தார்." கிறிஸ்து சபையைப் பேணிக்காப்பது போல, கணவன் மனைவியைப் பேணிக்காக்க வேண்டும். இந்த ஒப்புவமையின் நிமித்தம் திருமணம் கனமானது.

ஏழாவது காரணம்: இயேசுவின் பிறப்பைப் பாதுகாக்க உதவியது இயேசு கிறிஸ்து மனிதனாகப் பிறக்கத் தேவன் ஒரு குடும்ப அமைப்பைத் தேர்ந்தெடுத்தார். கன்னி மரியாளின் வயிற்றில் இயேசு உருவானதை அந்த சமூகத்தால் எளிதில் புரிந்துகொள்ள முடியாது. யோசேப்புக்குக் கூட தேவதூதன் வந்து சொன்ன பிறகுதான் அவர் அதை நம்பினார். அதற்கு முன், "அவளை அவமானப்படுத்த மனதில்லாமல், இரகசியமாய் அவளைத் தள்ளிவிட யோசனையாயிருந்தார்" (மத்தேயு 1:19). ஆனால் தேவன் அந்தத் திருமண பந்தத்தை உறுதிப்படுத்தினார். திருமண உறவு என்ற பாதுகாப்பு இருந்ததாலேயே, இயேசுவைப் பார்த்து "இவன் தச்சனுடைய மகன் அல்லவா?" என்று சொல்ல முடிந்ததே தவிர, உலகம் அவரைத் தவறாகப் பேச இடமில்லாமல் போனது. திருமண பந்தத்தின் மூலமாகவே தேவன் தம் குமாரனின் பூமிக்குரிய வாழ்க்கையைப் பாதுகாத்தார்.

எட்டாவது காரணம்: இயேசுவின் முதல் அற்புதம் இயேசு கிறிஸ்து மனிதனாக இந்த பூமியில் ஊழியம் செய்தபோது, தனது முதல் அற்புதத்தைத் திருமண வீட்டில்தான் செய்தார். "இவ்விதமாக இயேசு இந்த முதலாம் அற்புதத்தைக் கலிலேயாவிலுள்ள கானா ஊரிலே செய்து, தம்முடைய மகிமையை வெளிப்படுத்தினார்" (யோவான் 2:11). திருமண வீட்டில் ஏற்பட்ட குறைவை நீக்கி, அதை சந்தோஷமாக மாற்றினார். இதன் மூலம் இயேசு கிறிஸ்து திருமணத்தை அங்கீகரித்து கனப்படுத்தினார். ஆண்டவர் எதைக் கனப்படுத்தினாரோ, அதைக் கிறிஸ்தவர்களாகிய நாமும் கனப்படுத்த வேண்டும்.

ஒன்பதாவது காரணம்: விபச்சாரம் மற்றும் முறைதவறிய உறவுகளை தேவன் வெறுக்கிறார் திருமணம் இல்லாமல் இணைந்து வாழுதல் (Living Together) போன்ற முறைகளை வேதம் வன்மையாக எதிர்க்கிறது; தேவன் அதை அங்கீகரிப்பதில்லை. பழைய ஏற்பாட்டில் இத்தகைய பாவங்களுக்கு மரண தண்டனை வரை கட்டளை இருந்தது. திருமணம் இல்லாமல் இணைந்திருப்பதையும், இச்சையின் இன்பங்களையும் வேதம் பாவம் என்று கண்டிக்கிறது. நவீன சட்டங்கள் அல்லது கலாச்சாரங்கள் இவற்றை ஏற்றுக்கொண்டாலும், வேதாகமம் இவற்றை "அருவருப்பு" என்று ஒதுக்குகிறது. தேவன் இந்த அருவருப்புகளை வெறுப்பதற்குக் காரணம், அவர் திருமணத்தை பரிசுத்தமாகவும் கனமாகவும் வைத்திருப்பதேயாகும்.

பத்தாவது காரணம்: திருமண பந்தத்தின் புனிதத்தன்மை திருமணத்திற்கு விரோதமாகச் செய்யப்படும் பாவத்தை தேவன் நியாயந்தீர்ப்பார். "விவாகம் யாவருக்குள்ளும் கனமுள்ளதாயும், விவாகமஞ்சம் அசுசிப்படாததாயுமிருப்பதாக; வேசிக்கள்ளரையும் விபசாரக்காரரையும் தேவன் நியாயந்தீர்ப்பார்" (எபிரெயர் 13:4). விபச்சாரம் என்ற காரணத்தால் மட்டுமே விவாகரத்தை வேதம் அனுமதிக்கிறதே தவிர, வேறு காரணங்களுக்காகப் பிரிவதை தேவன் வெறுக்கிறார். "தள்ளிவிடுதலை நான் வெறுக்கிறேன் என்று இஸ்ரவேலின் தேவனாகிய கர்த்தர் சொல்லுகிறார்" (மல்கியா 2:16). ஆகையால், நாம் ஒருவருக்கொருவர் துரோகம் பண்ணாமல் எச்சரிக்கையாக இருக்க வேண்டும்.

முடிவுரை திருமணம் ஏன் கனமானது?

1. தேவனே அதை ஏற்படுத்தினார்.

2. தேவனே இருவரையும் இணைக்கிறார்.

3. தேவனே அதற்குச் சாட்சியாயிருக்கிறார்.

4. பெற்றோர் உறவை விட இது உயர்ந்தது.

5. இது தேவனுக்கும் மனிதருக்கும் உள்ள உறவை விளக்குகிறது.

6. இது கிறிஸ்துவுக்கும் சபைக்கும் உள்ள ஐக்கியத்தைக் காட்டுகிறது.

7. இது இயேசுவின் பிறப்புக்குப் பாதுகாப்பாய் இருந்தது.

8. இயேசு முதல் அற்புதத்தைத் திருமண வீட்டில் செய்தார்.

9. முறைதவறிய உறவுகளை தேவன் வெறுக்கிறார்.

10. திருமணத்தை மீறுபவர்களை தேவன் நியாயந்தீர்க்கிறார்.

ஆகவே, தேவனுடைய பார்வையில் மிகவும் உயர்ந்ததான இந்தத் திருமணத்தை தேவனுடைய பிள்ளைகளும் கனமானதாக எண்ண வேண்டும். தேவன் விரும்புவதை விரும்புவதும், அவர் வெறுப்பதை வெறுப்பதுமே தேவபிள்ளைகளின் குணமாக இருக்க வேண்டும். புதிதாகத் திருமணம் செய்துகொள்கிறவர்களும், திருமணமானவர்களும் இந்த உறவை என்றும் கனமுள்ளதாகப் பாதுகாக்க கர்த்தர் கிருபை செய்வாராக.